Asturies acumula 3 años de descensos interañales del paru: 27.000 desemplegaos menos

La baxada del paru n'abril foi del 1,73 por cientu, menor que la media estatal.

Dende abril del 2021 los datos interñales del paru n'Asturies nun apararon de baxar. Esi mes finaba con 83.542 desemplegaos nel país, cifra qu'agora queda en 56.565 llueu de rexistrar 994 menos en comparanza con marzu.

Supón un descensu del 1,73 por cientu, cuando la media estatal foi del 2,22 por cientu al menguar en 60.503 persones que dexen el total en 2.666.500. Illes Balears torna a liderar la baxada con un 4,84 por cientu, siguida nesta ocasión por Castilla-La Mancha (3,85 por cientu) y Castilla y Lleón (3,01), mentes que l'únicu llugar onde medra ye en Canarias, un 1,47 por cientu.

La cayida del paru nel país foi xeneralizada y llegó por igual a homes y muyeres, a tolos grupos d'edá y a tolos sectores productivos de la economía asturiana, tanto en términos mensuales como interañales. La industria, sobre manera les actividaes venceyaes col sector del metal, rescampló pol so dinamismu.

Si comparamos los datos colos d'abril del 2023, Asturies cuenta 3.784 desemplegaos menos, un 6,27 por cientu. Esti descensu ye mayor que la media estatal, que ye del 4,37 por cientu al ver rebaxada la demanda de trabayu en 121.870 persones.

Galicia (9,34 por cientu), Murcia (9,23) y Illes Balears (8,98) presenten les meyores cifres, mentes que Melilla (10,85) y Euskadi (1,44) son los únicos llugares onde medró'l paru en términos interñales.

36 meses d'incrementu d'afilaos a la Seguridá Social

Nestos trés años les afiliaciones a la Seguridá Social siguieron un rumbu ascendente que yá permitió completar 36 meses siguíos d'aumentu de l'afiliación. Asina, si en mayu del 2021 había 362.662 persones con emplegu, agora son 381.288. El mes anterior la cifra de cotizantes yera de 379.685.

No que respeuta a les contrataciones n'abril, foron 18.864. Supón un 8,1 por cientu más qu'en marzu, cuando hebo 17.458.